SA ILALIM ng Republic Act 6713, lahat ng opisyal ng pamahalaan ay dapat ideklara ang kanilang pag-aari taun-taon.

Subalit ang kailangan lamang ipaalam sa taumbayan ay ang assets ng kanilang mga asawa at anak na wala pang 18 taong gulang.

Tila hindi inaasahan ng mga nagbalangkas ng batas na magkakaroon ang Pilipinas ng isang pangulong tulad ni Estrada na lantarang aamin na marami siyang babae at anak sa labas.

May problema sa ganitong sitwasyon—lalo na kung ang sanga-sangang relasyon ng isang opisyal ay nagbibigay-daan sa napakaraming querida at anak sa labas na aktibo sa negosyo.

Pero pinupunuan ng ibang batas ang kakulangan ng RA 6713.

Maliwanag sa Anti-Graft and Corrupt Practices Act na maaaring samantalahin ng mga kamag-anak o "close personal relations" ng isang opisyal ang kanilang relasyon sa pamamagitan ng "directly or indirectly requesting or receiving any present, gift or material or pecuniary advantage from any other person having some business, transaction, application, request or contract with the government, in which such public official has to intervene."

Saklaw ng kategoryang "closer personal relation" sa nasabing batas ang mga malapit na kamag-anak, kaibigan, at mga kasamahan sa kapatiran at sa trabaho ng isang opisyal. Sa ilalim ng kategoryang ito'y tila maaaring mapabilang ang mga kabit at anak sa labas ng isang opisyal.

Ang mga nasabing batas ay may kabuluhan lalo kung ang pag-uusapan ay ang napakaraming negosyo ni Guia Gomez, ang babaeng kinasamang matagal ni Estrada at ina ng kanyang 31-taong-gulang na anak na si Jose Victor "JV" Ejercito.

Business-minded
Si Gomez ang lumalabas na pinaka-business-minded sa lahat ng mga karelasyong babae ng Pangulo. Base sa records ng SEC, si Gomez ay may pera sa 33 kumpanya na may kinalaman sa real estate, food, office machinery, trading at semiconductors. Si JV ay kasosyo ni Gomez sa 11 kumpanya.

May sariling mga negosyo rin si JV. Siya ay incorporator at stockholder sa 8 iba pang kumpanya.

Shareholder din sa 2 kumpanya ni Gomez si Joel O. Ejercito samantalang ang kanyang kapatid na si Ma. Theresa O. Ejercito ay stockholder naman sa 5 kumpanya. Sina Joel at Ma. Theresa ay anak ng Pangulo kay Peachy Osorio, anak ng isang direktor sa pelikula na nakarelasyon ni Estrada bago siya nakasal kay Loi Ejercito.

Base sa mga rekord, ang pinakasentro ng mga negosyo ni Gomez ay real estate at trading. Nagmamay-ari siya ng di bababa sa 7 kumpanya ng real estate na may authorized capitalization na higit P200 milyon.

Real estate
Hindi maliwanag mula sa datos ng SEC kung magkano ang real assets, kabilang ang mga lupain at iba pang ari-arian, ng mga kumpanya.

Halimbawa, ang EG Properties na itinatag noong Nob. 23, 1998, ilang buwan matapos itanghal si Estrada bilang pangulo, ay may authorized capital na P100 milyon. Ang P25 milyon dito ay pinunuan nina Gomez (P12.5 milyon) at nina JV, Joel at Ma. Theresa, at isang Joey G. Estrada (P12.5 milyon).

Isa pang real estate company ni Gomez ay ang Meiji Inc. na nagdedebelop ng isang housing estate sa Cavite. Ang Meiji ay may authorized capital na P100 milyon-P7 milyon ay pinunuan na nang itatag ang kumpanya noong June 24, 1992, higit isang bu-wan matapos manalo bilang bise presidente si Estrada.

Si Gomez ang may pinakamaraming shares sa Meiji-naglabas na siya ng P4 milyon sa P16 milyon na subscribed capital nang irehistro ang kumpanya sa SEC. Si JV ang ikalawa sa may pinakamaraming parte sa Meiji.

Ang iba pang real estate companies na nasa pangalan ni Gomez ay ang Grand-meadows Properties Inc., El Pueblo Builders Inc., Apex Land Inc., All Time Realty Consultants and Managers Inc., at JV&G Inc.

Pagtanggol ni JV
Walang batas na nagba-bawal sa mga kalaguyo ng isang pangulo na magnegosyo.

Pero sadyang nakaba-bahala kung ang negosyong papasukin nila ay may kinalaman sa gobyerno. Ang mga housing project ay kailangang sumunod sa zoning at environmental regulations. Ang mga kumpanya ng real estate naman ay maaaring mangutang sa mga government financial institutions.

Nang tanungin tungkol sa mga negosyo nilang mag-ina, ipinagtanggol ni JV Ejercito ang kanilang ginagawa.

Aniya, "We are business people and we have been in the past 10 years. We never dealt with any government project since my father is a public official, and we will continue avoiding deals with the government."

Mahirap panghawakan ang pahayag na ito ni JV. Ang tanging anak ni Estrada kay Gomez ay ang pinakamalaking shareholder ng isinarang Best World Construction Corp., affiliate ng kontrobersiyal na BW Resources Corp., ang kumpanyang nasangkot sa insider-trading scandal